دعەمرەكي دا مامه، دتەمەنەکی دا مامە/ئەمرەكى دا مامه)
پێشگۆتن :
هەر وەکی ژ ناڤێ قەولی دیار و خویا و ئاشکەرا ئەف قەول باسی ژیانا مرۆڤی دکەت دەمێ مرۆڤ یێ خەمگین و کول و دەرد هەین و تشتەکی ژ ژیانا خۆ فامناکەت راستی و شاشیێ و خێر و شەرا ژ هەڤ جودا ناکەت و خۆ دبینت بێ فەلەک و بێ سعود و ئێقبال و جار خۆ دبینت شاش و جار خۆ دبینت ل سەر ڕێیا راست و کول و دەردێت خۆ بۆ خودایێ خۆ بێژت و بانگا خۆ بگەهینتە خودايێ خۆ ، هەروەسا ئەف قەول باسی مرنێ و ئاخرەتێ دکەت و هندک سەبەقە ب شێوەیێ شيرەتان تێدا هاتنە ، دناڤەرۆکا ڤی قەولیدا نەفسا مرۆڤی وەکی (بۆر) ئانکو هەسپ هاتیە ناسکرن بۆ تێگەهشتنێ وەک دفەلسەفا بتریا قەولاندا کو بۆر ب رامانا نەفسێ دهێت ، ئانکو مرۆڤ و نەفس مینا کەسەکی ل سەر هەسپەکێ بت ،
دناڤەرۆکا ڤی قەولیدا دەمێ باسی مرنێ و ئاخرەتێ دکەت دبێژت ئەز برم جەم خودێ بەلێ مەرەم ژ ڤێ چەندێ ئەوە کو پشتی مرنێ ئانکو ل ڕۆژا ئاخرەتێ دێ هۆسا بیت ٠
و ئەڤە ژی دەقێ قەولێ (دعەمرەكى دامامه\د تەمەنەکی دا مامە /ئەمرەكى دا مامه) ۰
قەولێ دعەمرەكى داما مه.
ب دەستوری خودێ
1- د عەمرەكى دا مامه٠
يارەكى ئەز رڤامه.
یارێ ئەز رڤامە.
ئەز ژ شەرقێ برمە شامه.
●●●
2- ژ شامێ هاتمه ئەز دبرمە شەرقێ۰
خەتا من ژ ڤێ.
عەزيزێ من ! كول و کار وعەمەلێت من ژ ڤێ۰
●●●
3- چەندی دئێم و دمەيزينم .
وێ دەگ بلند دكەم ۰
وێ ل ڤێ دنیایێ دسەيرينم۰
ئەز کەسی ژ خۆ گونەهتر نابینم۰
عەزیزێ من ! كەسەكی ژ ته چێتر نابينم ۰
●●●
4- چەندی دئێم و دفكرم .
بەيانا سلتان ئێزي دسەر خۆڕا هلدگرم .
عەزيزێ من ! ل روويێ ڤێ دنیایێ ئەز ژ حەمووا ب گونەهترم .
●●●
5- شوكر ئەز ب تەڕا ئەزی ب عێب تو عێرفەكی بێ عێب.
ل روويێ ڤێ مەجلسێ تە ئەز كرمه عەجێب.
گونەهێت من دپڕن نائێنه حسێب !
●●●
6- ئەڤنه پلنگ دێ بنه بازی.
كەس ل روويێ ڤێ مەجلسێ ناكەت گازى.
ئەز ژ خۆ گەلەك نەی رازى.
●●●
7- ئەڤنە پڵنگ دێ بنە شێر ۰
كەس ل رويێ مەجلسێ ناپەڤت ب خێر.
ئەز بانگا خۆ دگەهینمه جەبێر.
●●●
8 ـ نە شێرم نە بازی
وەختێ تە ل من دکرە گازی
من ل خۆ نێری و هەڤرازی
●●●
9ـ نە بازیمە نە شێر۰
کەس بمنڕا ناپەیڤت بخێر
من بانگا خۆ گەهانده جەبێر
●●●
10- عەزيزێ من ! تە ئەز ل بۆرەکی سەرحشک كرم٠
چو جارا خۆ پێ ناگرم .
ژ كەفتنا خۆ ئەزی حەيريم٠
● ● ●
11 - سەر حشكه و من چاره پێ نينا٠
وێ بەرێ خوە ددەتە رەڤینا
وەختێ بەرێ وی كەفته رەڤينا.
عەزیزێ من! ئەز دترسم ژ زەبێنیا٠
● ● ●
12ـ سەر حشكه و من تێ نينه چاره.
خودان ژ دەستا ئی بێ زاره.
بازددەت خەندەكان و كانداله۰
ل ڕۆژا ئاخرەتێ دێ مە ئێختە دەستێ زەبێنیت ب ساف و هەیبەتە۰
● ● ●
13ـ ئەز رەڤيام و گاڤ ل من بڕيان .
وەختێ زەبێني بمنڕا گەهيان .
ژ ترسادا دل و هناڤێت من بزديان !
● ● ●
14ـ تە ئەز ل بۆرەکی کرم نە دبەزی۰
ل سەر لحێفا درازیم
تەنشتا من دتەزی
عەزیزێ من! تە ل حالێ من پرسی ل روویێ ڤێ مەجلسێ بتنێ ته ل من دکرە گازی۰
● ● ●
15ـ چۆمە شکەفتێ بەفر و باگێر دبی۰
چۆمە سەر پڕێ پڕ ل من وەربی۰
کەری دکڕم لەنگ دبی۰
● ● ●
۱٦ـ سۆلێ دکڕم تەنگ دبی.
هەکە ژنکێ بینم جوان دەنگ دبی۰
گەلۆ ! ما بێ دەولەتی ب چی رەنگ دبی؟؟
● ● ●
۱۷ـ عەزيزێ من ! ل رويێ ڤێ دنيايێ مەفەرەك نينه .
هەكە علمەكى بێژم ، دێ بێژن وە نيه .
هەكە خێرەكێ دكەم ، دێ بێژن چەندى دينه .
هەكە گۆتنەکێ دكەم دبێژنه من چەندی دەرەوينه۰
● ● ●
۱۸ـ عەزیزێ من ! ل ڤێ دنێ من فەلەک نینە۰
ژ بلی تە کەسی های ژمن نینە۰
عەزیزێ من ! توو حالێ دبینە۰
● ● ●
19 ـ چەندی دگریم وچەندی دئێشم و دناڵم۰
کەسەکی نەدزانی بچی حالم ۰
هەتا ڕۆژا ئاخرەتێ ب گۆلا خودایێ خۆ دناڵم٠
● ● ●
20 - وەرن كەسەكی مەعريفەت ل بال۰
خودێ سەكنى و ڤەوەستا بوو ل خەيال .
كێ ديتيه عاشق بت ئی بێ هەڤال؟!.
● ● ●
21 ـ ژ ملکا و شاخا۰
ل وان سور گولا ل وان باغا۰
کێ دیتیە ئاشقێت بێ ئاخا۰
● ● ●
22 ـ عاشقێ پەستا هەنه .
ژ تاری و تالیێ دەنگ دكەنه .
ئەو نزانن ل رۆژئاخرەتێ ،ئەو دكەڕ و دكۆڕەنه .
●●●
23 ـ عاشقێت پەستا دزاڤن .
هاوری دۆرێت وان حەموو داڤن .
ئەو نزانن ل رۆژئاخرەتێ ،ئەو دكەڕن و دكۆر دبێ چاڤن.
●●●
24 - ئەون عاشقێت پەستا .
وان ڤەنەخوارينه ژ كاسا مەستا .
لەو بۆرێ وان ل مەزن مەيدانا مەلەکا دوەستا.
● ● ●
25 - بۆرێ من ئی بێ دەولەته .
دسەرى دا نەمايه غيرەته.
ب گاڤا ئی کێم تاقەتە۰
لێ نەما حەرەكەته ئەز ئێخستمە دەستێ زەبێنیت ب سافەتە۰
عةزيزێ من ! من بينەدەر ژدەستێ زەبينێت پڕ ئۆسفەته .
● ● ●
26 - بۆرێ من ل دنێ .
چاڤ ل کوشتنێ ل دەرەوێ ل زنێ.
عەزيزێ من ! ئەز دترسم ، من شەرمەزاربكەت ل ڕۆژا ئاخرەتێ !.
● ● ●
27 - بۆرێ من ئی جاهله و نە بەدەوە.
ژ من دڤێت خوارن و ڤەخوارن و خەوه.
عەزيزێ من ! ئێ غەدار و دسەکنت ل مەزن مەیدانا مەلەکا هەر ئەوە!!
● ● ●
28ـ بۆرێ من ب کارێ خۆ بەرگيره ، نە كعێله .
ڤێرا نەمايه چوو فعێله .
عەزيزێ من ! ئەز دترسم دێ من شەرمەزاربکەت ل ديوانێت جەبێره .
● ● ●
29ـ وەختێ زەبێني ل من دەهاتن .
خێر و گونەهێت من دكێشاندن۰
ل بەر ميرێ مەزن داناندن.
هەفت جاران جاران گوننەهێت من ل خێرێت من دەردهاتن۰
● ● ●
30ـ برمە حزرەتا جەبێرا٠
وێ تەفتێش دکەن خێر و گوننەهێت مێرا٠
وەختێ خێر و گوننەهێت من دکێشا ٠
هەفت جارا گوننەهێت من دەرکفتن ل خێرا ٠
● ● ●
31 ـ وەختێ زەبێنی ل من حدرین۰
ل بەر ساڤ و هەيبەتێت وان ئەز گريم .
ژ بەر و كار و نەبوێت ل دنيايێ من کرین٠
● ● ●
32- خەلکۆ هوون مەکەن نه بێژیا ٠
خۆ دوور کەن ژ خرابیا .
سلتان ئێزی ئی قادرە ئی حازرە ل حەموو جیا۰
●●●
33 ـ حالێ من حالەکی ژارا .
من ژ دەستێ زەبێنا گازی و هاواره .
من گۆت : نە سەد خۆزيكا روحێت گونەهكارا !.
●●●
34 - حالێ من حالێ حەسەنه۰
زەبێني تێن ژمن پرس دكەنە.
گەلۆ توو خودان ئیمانی و تە ئێزی مەفەرە؟
●●●
35 ـ من گۆ ! شکر ئەز ب ئيمانم .
و ب نافێ ئێزی مەفەرم۰
ل سەر ناڤ و دكارێ ئێزی ئێ شرينێ ئەزی موتام۰
●●●
36 - وێ كێلەكێ ئەزی وەها بووم .
ب كێفا خۆ ئەزی شا بووم .
ب ناڤ و دكارێ سلتان ئێزیێ شرین ئەزی موتا بووم۰
●●●
37 - ئەوه رۆژا پێ پره .
ل پێشيا مە ئاگره .
ئەوێ ڕۆژێ سلتان ئێزی بوو مەفەره .
● ● ●
38- بانگا منە ب وی ئێزدانی۰
كەفتمه بەختێ وی سلتانی ۰
خالقۆ ! توو چەندی رێزانی .
● ● ●
39 ـ ژ خوار هەتا بانی .
ژ عەردا هەتا ب عەزمانی .
سلاڤێت مە موخلوقا ل خودانی۰
توو ب حەموو دەردا دزانی
ل حەموو دەردا تو دەرمانی .
● ● ●
40 ـ بانگا منە ب ئێزییە ۰
ب رەحم و شەفقەتا خۆ ل مە دگەرییە۰
لێ دکر زینەکی قودرەتیە۰
مە ل وێ دیت مۆرا خۆ کانیا سپییە.
● ● ●
41 - كانيا سپی و قوبلەت بدوره .
ئەو كورسيا ژباتنێدا ب مۆره .
ئەو جیێ ئێزیێ منێ سۆرە .
● ● ●
42 ـ ئەز برمه ديوانا پەدشێ منێ هەر وهەرە۰
ل بەر سەكنی هەفتی هەزار قەلەندەرە .
نور ژ كەسك و سۆر و سپی و زەرە .
ژێ تێ بێهنا خۆش ، بخور و مسك و عەنبەرە .
کورسیا ئێزی سەکنی بوو ل سەرە۰
● ● ●
43- کورسیا سلتان ئێزی رونشتبوو ل سەر ۰
یە ب لال و دور و پیرۆز پری جەوهەر۰
ژ بەر دچن هەفتی هەزار وتەر ۰
●●●
44- کاس ژ قودرەتێ و دۆلی ژ دورەکا زەر ۰
ساقی ئێزیێ منێ مەفەر ۰
دۆل یا پەدشێ منێ هەر و هەر ۰
●●●
45- مە ل وێ ديت خۆشی و شايی.
دەف وشباب و شاز و موغەنی و تەنبور ئەغلەر۰
ئەو جندینە ئێ ب راستی رێیا ئیمانا خۆ دبە سەر.
● ● ●
46 ـ ژ موحەبەتا خۆ دگەرينن كاس .
کاس ژ قودرەتێ دور ژ دورەكه ئەلماس .
سلتان ئێزی پەدشێ منی رێناس .
● ● ●
47 ـ ئەز برمه ديوانا پەدشێ منی جەلال .
هەفتی هەزار قەلەندەر ل بال .
نور ژ كەسك و سۆر و سپی و رەش ئال .
● ● ●
48 ـ ژ يێ رەش خومار .
ژێ تێ بێهنا خۆش سۆسن و بەيبون وريحان .
ديسان ل سەر قەدەمگەها راوەستان .
حلێ رەش ل بەژنا وان .
گۆ بلا بێن خودان ئيمان خودان ئەرکان .
دا بچنە ديوانا سلتان ئێزی بكەین سەيران .
● ● ●
49 ـ چی سەيرانەكه هۆيه ب نوره .
گەلۆ چی سەیر هەبوو ل دیوانا ب نورە۰
کاسێ ل ناڤ وان دگەرین کاسا موحەبەتە ۰
کاس ژ قودرەتێ دۆلی ژ دورەکا مەخمورە۰
سلتان ئێزی پەدشێ منێ غەفورە ۰
● ● ●
50 ـ من ل وێ ديوانێ ديت خۆشی و شايی .
دەف و شباب و تنبور موغنی ئەغلەر.
ئەو ژی دێ چنە حزرەتا ئێزی حال و مشور
● ● ●
51 ـ ئەز برمه ديوانا پەدشێ منی رێناس .
لبەر سەكنی هەفتی هەزار قەلەندەر و خاس .
نور ژ كەسك و سۆر و سپی و رەش لباس .
● ● ●
52ـ من دیت دوو چاویش ل قەدەمگەها راوەستان۰
ئێک دبێژنێ خدر و ئێک دبێژنێ لیاس۰
ژ موحەبەتێ دگێرن کاس۰
● ● ●
53- کاس ژ قودرەتێ دۆلی ژ دورەکە ئەلماس۰
من ل وێ دیتبوو خۆشی و شاهی دەف و شباب ! موغەنی و تەمبور ! ئەغلەر و شاز۰
سلتان ئێزی مرازێت مە حاسل بکە و چی کەسێ مراز خواز.
●●●
54 ـ برمە دیوانا باتنێ
سێ سەد و شێست و شەش عالم وێ دکەن خوندنێ۰
سەرێ حەمووا ئێزی پەدشایێ من ئێکی ب تنێ۰
ئەم دکێمین وخودێ ئی تەمامە۰
--------------------------------
شلۆڤەکرن :
1- سەبەقا ئێکێ(1) دخوازت بێژت : ڤێ دنیایێ ئەز برمە و ئەز ڕڤامە و جار ئەز کارێ خراب دکەم و جار کارێت باش ، شەرق و شام رامانا کار و هزرێت خراب و باش دگەهینت ۰
2 ـ سەبەقا دوێ(2) دخوازە بێژە : هزرێت من ژ لایەکی بۆ لایەکی دی گهۆرین و کارێت من ژ جۆرەکی بۆ جۆرەکی دی گهۆرین و ئەز تشتەکی ژ خۆ فامناکەمە لەوما ئەز وێ بانگ دکەمە خودێ و من گوت یاعەزیزێ من ئانکۆ یاخودایێ من توو وێ حالێ من دبینی۰
3 ـ سەبەقا سێیێ(3) دبێژت" ئەز تشتەکی ژ خۆ فامناکەمە و چەندی دگەرێم و بەرێ خۆ ددەمە ڤێ دنیایێ و وێ دکەمە هاوار ئەز وێ خۆ ژ هەموو خەلکێ گونەهکارتر دبینم و کەسێ های ژمن نینە یاخودێ یا عەزیزێ من ل ڤێ دنیایێ کەس ژ تە راست و باشتر نینە کو ژمن تێبگەت و فامبکەت و هاریکاریا من بکەت۰
4 ـ دسەبەقا چارێ دا(4) ئانکو ئەز چەند هزردکەم و دفکرم ل ڤێ دنیایێ ئەز تشتکی دورست نابینم و کەسەکی نابینم کو ل حالێ من بپرست و بکارت هاریکاریا من بکەت و ئەز وێ خۆ ژ حەموو کەسی گونەهکارتر دبینم و وێ دبێژت بتنێ خودایێ خۆ دسەرخۆرا دبینم و هەلدگرم ئانكو هزرا وى دكەم ٠
5ـ دسەبەقا پێنجێ(5) دا وێ دبێژتە خوداێ خۆ سوپاس کو ئەز وێ دگەل تەمە و تە دسەرخۆرا دبینم چنکو تو ئێکی بێ کێماسی ئی بێ گونەهی ئی بێ غەلەتی و ئەز ئی بگونەهم و ئی ب کیماسیمە و ئەز وێ خۆ ل ڤێ دنیایێ دبینم عەجێب چنکو گونەهێت من گەلەک و گەلەلن و ناهێنە هژمارتن بەلێ هێش توو وێ دگەل منی و دەستا ژمن بەرنادەیە خەلکێ حەمووێ دست ژمن بەردان و تەرکا من دان لەوما وێ سوپاسیا خودێ دکەت ۰
6 ـ دسەبەقا شەشێ و هەفتێ(6 - 7) دبێژت خەکێ ل دۆرا من وێ دهێنە گوهارتن و غەیرین وەکی پڵنگ و بازی و کەس گازی من ناکەتە و ل من ناپرسە حەموو دگەل من وەکی شێرا د دڕەندەنە و بترسن و کەس ب باشی دگەل من نا ئاخڤت لەوما ئەز خۆ دبینم وەکی ئێکی غەریب و نە ژ وان و ژ بەر هندێ ئەز گەلەک ژ خۆ نەی رازی مە و بانگ و هاوارا خۆ دگەهینمە خودايێ جەبێر ۰
7ـ د سەبقا هەشتێ و نەهێ(8- 9) دا دبێژت ئەز
نەشێرم و نە بازی " ئەز وەکی وان نەی دڕندەمە و من هێز وەکی وان نینە ل بەرامبەر وان و ڤێ دنیایێ بسەکنم و هەر وەسا ئەز بخۆ وێ خۆ گونەهکار دبینم و ئەز پێتڤی هاریکاریێ مە بەلێ کەسی های ژمن نینە و کەس ئی باش و بێ کیماسی نینە ل من بپرست لەوما ئەز بانگا خۆ دگەهینمە خودايێ جەبێر ئێ بێ کیماسی ئی تەمام و خودان هێز و هەیبەت ! یاخودێ وەختێ تە ل من دکر گازی من ل خۆ نێری و هەڤرازی" وەختێ من هەست ب هاریکاریێ کری مەرەم ژێ ئەوە ئانکو دەمێ د هندڕۆیێ من دا ئارامی ل جەم من پەیدابووی و دلێ من هنەکێ ئارام بووی هنگی من زانی تووی یا خودايێ من و من زانی تووی ئارامیێ ل جەم من پەیدا دکەی و من زانی تە ئەز بتنێ نەهێلام ل ڤێ دنیایێ و تە دڤێت ئەز ژی دگەل تە بم لەو من بەرێ خۆ دایە تە ل ژۆر " هەڤراز " سەری" و من زانی تووی ل هاوارا من هاتی و ل حالێ من دپرسی۰
8ـ دسەبەقا دەهێ و یازدێ و دوانزدێ و سێزدێدا(10 ـ 11 ـ 12 ـ 13 ) هەر وەکو مە ل دەستپێکێ گۆتی و ئاماژە پێ دای دڤی قەولیدا بۆر وەک هەسپ هاتیە بکار ئینان بۆ نیشانكرنا نەفسێ و دەمێ دبێژت " تە ئەز ل بۆرەكی سەرحشک كرم ئانکو نەفسا من یە سەرحشکە و من هێز ل سەر نینە کۆنترولێ پێ بکەم و بکارمێ ئەو وەکی هەسپەکی سەرحشکە و نەی کۆنترۆلکری و کەس نکارت سەری وی زەبت بکەت و وێ دبێژت ئەز گەلەک وێ دترسم چنکو دڤێتە برەڤت ئانکۆ نەفسا من ژ دەست من دەرکەڤت و ئەگەر رەڤیا ئانکو ئەگەر نەفسا من ژ دەست من دەرکەفت و من نەکارییە نەفسا خۆ و من کارێت خراب کرن چنکو یە سەرحشکە و ئەز نکارمێیە دێ بازدەت خەندکان و کەندالا ئانکو دێ چت بەر بکارێت خراب خودانێ وێ ئانکۆ مرۆڤ دمینت بێ زار بێ و هێز ! و هنگی دێ وەکی هەسپەکی بت بازبدەت کەندال وکۆرا و چێبت خۆ بریندار بکەت و خو زێدە زەحمەت بددەت " هۆسا نەفسا من دچت بەر ب کارێت خراب !! وێ دبێژت دترسم ژێ چنکو دێ ل رۆژا ئاخرەتی ژی دێ من ئێختە کەندال و کۆرا ژ بەر خرابیێت من ل دنیایێ کرین و دێ ئەز کەڤمە دەستێ زەبێنیا دێ من بەنە جۆرێ و عەزابێ ژ بەر کارێت خراب یێت ل دنیایێ من کرین سەرا وێ نەفسێ " وێ دبێژت ئەز رەڤیام بەلێ کارێت من دخراب بون ل دنیایێ لەوما من نکاری ئەز برەڤم وگاڤێت من بڕیان ئانکو هاتنە بڕین و نەدچۆن لەو ئەز مامە ددەستێ زەبێنیا و وەختێ ئەز کەتمە دەستێ زەبێنیا ژ بەر کارێت من یێت خراب ل دنیایێ من کرین دل و هناڤێت من بزدیان ژ ترسا و جۆر و عەزاب مەرم ژێ پاشەرۆژە ژی ئانکو دێ مرۆڤ کەفتە د ئاریشاندا ۰
9 ـ دسەبەقێت چاردە و پانزدە و شازدە و هڤدە و هژدە و نۆزدە( 14ـ 15ـ 16ـ 17 ـ 18 ـ 19) دا دیسان بۆر وەک نەفس و شەهواتێن مروڤی بکار هاتیە و دبێژت نەفسا من وەکی هەسپەکیە کو بازنادەت ئانکو خێرێ ناکەت نکارت کار بکەت و من چو چارە پێ نینە و کەس ل من ناپرست وگازی من ناکەت ل ڤێ دنیایێ " وێ دبێژت یا خودێ بتنێ تو ل حالێ من دپرسی وگازی من دکەی " و وێ دبێژت هەر ئەز چی کاری بکەم ب سەرناکەڤم و کارێ من خراب دبت و دبێژت ئەزی بێ سعود و فەلەکم بێ دەولەتم ۰
و گازی خودێ خۆ دکەت و دبێژت یا خودێ یا عەزیزێ من" ژبلی تە من چوو مەفەر ل ڤێ دنیایێ نینن کەس ژ من فامناکەت و تێناگەهت و ئەز دبینم حەموو دژی منن چنکو هەکە علمەكى بێژم ، دبێژن نە هۆسایە " نە وەهایە و ۰وەختێ خێرەكێ دكەم ، دبێژنه من چەندى دينه.هەكە گۆتنەکێ " پەيڤەكێ دكەم دبێژنه من چەندی دەرەوينه ۰
و وێ دبێژت خوێیۆ !عەزیزێ منۆ ل ڤێ دنیایێ من چو سعود و فەلەک نینە و ژ بلی تە کەسی های ژمن نینە ، توو بتنێ ب حالێ من دحەسیێی و دزانی و توو بتنێ ژمنڕا دەرمانی ۰
دبێژت ل ڤێ دنیایێ ئەز چەند وێ و دئیشم ودکەمە گری بەلێ کەس ب من ناحەسیێتە وحالێ من ناپرسە ونزانە بتنێ توو دزانی ب حالێ من کا ئەز ب چی حالم " وێ دبێژت هەتا مرنێ بەس دێ کارم بوتە دەردێ خۆ بێژم ۰
10ـ د سەبەقا بیستێ هەتا یا بیست و چارێ(20ـ 24) دا " وێ دبێژت بەرێ خۆ بدەنێ کەسەکی خودان مەعریفەت و خودان ئیمان و علم ل بال و ئی زانا ب رێیا ئیمانێ ، و خودێ وێ دخەیالا ویدا ئانکو هەردم بخودێ هزردکە و کار و کارێت خراب ناکە بەلێ پا یێ بێ هەڤالە ل ڤێ دنیایێ ، .........وەکی گولەکێ بت یە بێ ئاخ ل ناڤ زەڤیەکێ یە بتنێ یە بێ خودان و کەس گوهێ خو نەدەتێ ۰
و وێ دبێژت و هندەک خۆ دکەنە عاشقێت خودێ ب مەدحا و دەرەوا و ژ وانڤە ئەو دکارن خودێ بخاپینن بەلێ ئەو نزانن ل رۆژا ئاخرەتێ دێ حەموو تشت دیاردبت و ل وێدەرێ ئەو خلاس نابن و دێ د وەکی کەسەکی کەڕ ئی دەنگ نەچنێ و ئی کۆرە بن ۰ و ئێت هۆسا گەلەک هەنە و دزاڤن ۰
ئەون عاشێت خودێ ب دەرەو و مەدحا و وان ڤەنەخوارينه ژ كاسا مەستا " ئانکۆ حش خودێ نەکرینە ژ عەشق و دل ژ کاسا موحەبەتا خودێ ڤەنەخوارینە لەوما ئەوێت هۆسا دێ کەڤنە دەستێ زەبێنیا و جزای وەرگرن ۰
11- د سەبەقا (25 ــ 31)دا " دبێژت نەفسا من یە بێ ئیمانە و چوو غیرەتا ئیمانێ من نینە و ئەس ل بەر نەفسا خۆ يێ بێ دەستهەلاتم نکارم کۆنترۆلێ ل سەر بکەم و ەز وێ کارێت خراب دکەم و چوو کارێت باش ژ من نائێنە و نکارمە چو کارێت باش بکەم.
نەفسا من وا ب دنیایێ دفکرت و چاڤ ل کوشتنێ و دەرەوێ و زنایێ ئانکو دامانپسیێ و نە ئی ل عەبادەتێ و خێرێ وخلمەتێيه ، نەفسا من یە جاهله یە نەزانە نەیە زانایە ژ من دخوازت خوارن و ڤەخوارن و خەوێ شونا خێری و خلمەتێ و عەبادەتێ ، نەفسا من بکار و کریارێت خۆ یە وەکی هەسپێ کار خراب و بێ خێرە و چوو هێز بۆ خێرێ ل نک نەمایە لەو ئەز وێ دترسم چنکو دێ من شەرمەزارکەت ل دیوانا حەقیێ ل دیوانا خودێ چنکو من کارێت باش نینن ۰
و وەختێ ملیاکەت دهێن و خێر و گونەهێت من ل نک خودێ دکێشن هنگی دێ گونەهێت من هەفت جارا ل خێریت من دەرکەڤن ، وەختێ ل دیوانا جەبێری ئانكو خودێ هاتن و خێر و گوننەهێت من پیڤان و کێشان هنگی گونەهێت من هەفت جارا ل خێریت من دەرکفتن ، لەوما وەختێ هاتن خێر وگونەهێت من بکێشن ئەز گریام ل بەر قەوت و هێزا وان چنگو من گەلەک کارێت خراب و نەبوو کربون ، لەوما کەفتمە ددەستێ زەبێنیا ژ گونەهێت خۆ " و وێ گازی خودێ خۆ دکەت و دبێژت عەزيزێ من! من بينەدەر ژدەستێ زەبێنیا من خڵاسبکە ژ جۆرێ و عەزابێ و هەر وەسان باسی ئاریشەیێن دنیایێیە ئانکو ئاريشەيێن ژيانێ٠
12 ـ د سەبەقا 32 هەتا ۰۰۰۰۰۰ " باسی ئاخرەتێ دکەت کا یە چاوایە و چی تشت ل ئاخرەتێ بۆ خەلکێ ب مفایە و دڤێت ئەم و چاوا بن ، و کاس ل دنێ ئانکۆ کاسا عشق وموحەبەتا خودێ و ل ئاخرەتێ برامانا کاسا ژیانا هەر و هەر ددەت ، دبێژت پشتی من زانی کا دنیا و ئاخرەت ئیت چاوانە ئەز دبێژمە وە گەلی خەلکێ هوون ئاخفتنێت خراب نەبێژن و خۆ دوربکەن ژ خرابیا (ستان ئێزی " خودێ) وێ ل حەموو جها ئي حازره و مەرم ژێ ئەوە کو ل ڕۆژا ئاخرەتێ دێ وەسا بیت ئانکو دێ مرۆڤ پۆشمان بیت ژ بۆ هەر کارەکی نە یێ ل رێیا خودێ مرۆڤی کربە۰
ــــــــــــــــ
فەرهەنگۆک :
1 ـ شەرق و شام " ڕۆژهەلات و ڕۆژئاڤا ل ڤردا رامانا کار و هزرێت خراب و باش دهێت۰
2- چێتر : باشتر .
3- بێ عێب : بێ كێماسى"ئی تەمامە۰
4- بۆر : هەسپ لڤردا رامانا نەفسێ ددەت .
5- حەيرييم : وێ ترسم ۰
6- بێ زار : تەنگاڤ ، بێ چاره .
7- كەندال : جهێت بلند .
8- رەڤی : نەفسا مرۆڤي دەمێ مرۆڤ ل پێ نەفسا خۆ بچيت حاشا وەكی حەيوانەكی بەردای لێ دهێت و هەموو كارێت خراب دكەت .
9- زەبێنی : ئەوێن ل رۆژا ئاخرەتێ عذاب و جۆری ب روحيت مرۆڤێت نەباش دكەن،ئەوێت كارێت خراب دژيانا خۆدا كرين و دبێ ئيمان .
10- مەفەر : رزگاركەر ، مُخلص .
11- وە نيه : نە هۆسايه ! نە ولۆيه ! نە وەسایە۰
12- مەعریفەت : علم و زانين .
13- ل بال : ل جەم ! ل نك .
14- شەبەك و داڤ : خەفك ، شەبەكه ب زمانێ عربی یە .
15- كاسا مەستا : كاسا عشق و موحبەتا خودێ كاسا خودێناسيێ٠
16- وەستا ، ماندی بو ، بێ تاقەت بوو . بێ هێز بوو .
17- بێ دەولەت : بێ سعود و ئێقبال .
18- حەرەکەت : لڤين ، هاتن و چۆن .
19- قەتل : كوشتن .
20- زنا : دامان پيسى.
21 - ديوانا باتنێ : جهێ ملياكەت و خاس و چاكان جهێ سور و كەرامەتا جهی معجزاتا ۰
21 - جاهل : نەزان .
22- بەرگير : جۆرەکی مەهينا يه ئی لاوازه .
23 - كعێل : جۆرەکی مەهينا ئی باشه .
24- متابووم : رازی و قايلم .
25- كێلەكێ : دەمەكی ، زەمانەكی ! وەختەکی ۰
26- بۆرا : ژویڕا.
27- ئەو دكەڕن و دكۆرەنه : ئانكۆ نە دنيايێ دبين نە دبهيسن .
28- ژ خوار هەتا بانی : ژ بنی هەتا سەری۰
29- قەلەندەر : خودێناسان و خاس و چاک ئانکو ئەو کەسێن خودان کەرم ۰
30- ئێك خدر و ئێك لیاس : ل ڤردا رامانا دوو ملیاکەت دگەهینت۰
31- نه بێژیا : ئانکو پەیڤێت نەخۆش و خراب.
32- سۆلێ : پێلاڤ .
----------------------------------------------------------
